Euskal Herriko janzkera zein modaren historia gertutik ezagutzeko aukera ematen du Jantziaren Zentroak. Kapitain etxean dago kokatua, Errenteriako alde zaharreko XVII. mendeko eraikinean.

Atariko solairuan, harrera gunea eta aldi baterako erakusketak daude.

Lehen pisuan, ikus-entzunezko bat ikusteko aukera du bisitariak. Horretan, Jantziaren Zentroa nola sortu zen, eta bertako erakusketa iraunkorra nola prestatzen den azaltzen da.

Bigarren eta hirugarren solairuetan, XVIII. mendetik 1970 urtera bitarteko modaren historia azaltzen da, horretarako 35 jantzi inguru daude Euskal Herriko zein nazioarteko jatorria dutenak. Herri xehearen zein goi mailako gizartearen bizi-modua, ohiturak, janzkera, azken finean garai bakoitzean indarrean egon zen moda ezagutzeko aukera da.

Errenterian sortu eta kokatutako proiektua izanik, gure sorterria ere gogoan dugu Jantziaren Zentroan. Bigarren solairuan Xanti eta Maialen Errenteriako erraldoi ezagunek ongi-etorria emango digute eta beira-arasa batean, Errenterian, “Manchester txikia” deitutako hirian XIX mendearen amaieran fabrikatan egindako objetuak, gure industria gogoan egindako omenaldi xumea.